MARAHIL nagtatanong na ang ibang lahi kung ano ang kinakain o anong meron ba tayong mga Pinoy.
Kaliit-liit na bansa pero nakakalikha ng mga pambato sa iba’t ibang sport. Salat sa yaman pero nakakatuklas ng mga atletang mas makinang pa sa ginto o diyamante.
Dati pag sinabing atletang Pinoy, si Manny Pacquiao ang bukambibig ng mga taga-ibang bansa.
COLUMN: Eala gives Philippine tennis a moment to remember
Nababanggit din si Efren ‘Bata’ Reyes.
Pero ngayon? Meron pa tayong Carlos Yulo, Hidilyn Diaz at EJ Obiena. Idagdag mo si Alex Eala.
Smorgasbord na. Halo-halo special. Win, win and win pa more.
Hindi tayo sports superpower. Hindi higante o dragon o tigre. Pero may mga sport na angat tayo at bilib sila sa Pinoy.
Tayo yung tipong maliit ngunit nakapupuwing. Aba sa dalas nating makapuwing ngayon baka higit pa sa sore eyes ang abutin ng kalaban. Kung yung pitik natin dati ay pang-asar lang, ngayon tunay na nakakasakit na. Ramdam na para bang hagupit.
Mantakin mo pati sa tennis namamayagpag na ang Pinoy. Dati hanggang paghanga lang tayo kina Roger, Rafa, Novak at Serena. Salamat kay Eala, may sarili na tayong pambato.
Dati rebound, traveling at three-second violation lang ang alam natin. Palibhasa sa basketball tayo nakatutok sa mahabang panahon. Ngayon biglang eksperto na ang kapitbahay mo sa double fault, matchpoint, forehand, backhand, smash.
Dahil yan kay Eala.
Sa pagsulpot ng mga bagong sports hero gaya nina Eala, Yulo at iba pa, namumulat ang ating mga mata sa kakayahan ng Pinoy na manaig sa mga paligsahan na hindi natin dating sinusubaybayan o pinag-aaksayahan ng panahon.
Maituturing na first love natin ang basketball at kung nais naman na makaahon sa kahirapan, boksing ang nagsisilbing daan kahit ito ay lubhang mapanganib.
Ngunit hindi lahat ay ipinanganak na matangkad para mag-basketball. Hindi lahat ay may pambansang kamao, na kayang kumain ng suntok at makipagbasagan ng mukha.
May ibang paraan upang magtagumpay at makilala sa mundo. Hindi kelangang buwis-buhay.
'Dapat matutong mangarap'
Pero mahalaga din ang tapang, talino, tibay ng loob at disiplina. Higit sa lahat dapat matutong mangarap.
Maliban kay Obiena, walang mga sinundang yapak sina Eala at mga kagaya niya. Walang role model na Pinoy sa landas na tinahak nila nang buong giting. Sila mismo ang nagbukas ng daan para sa iba pang kababayan.
Anong meron sina Eala? Imahinasyon.
Get more of the latest sports news & updates on SPIN.ph
NOTICE ON UNAUTHORIZED AND UNLAWFUL USE, PUBLICATION, AND/OR DISSEMINATION OF SPIN.PH CONTENT: Please be notified that any unauthorized and unlawful use, publication, and/or dissemination of Spin.ph’s content and/or materials is a direct violation of its legal and exclusive rights to the same, and shall be subject to appropriate legal action/s.
